حتة صغيّرة

جوايا لسة حتة صغيّرة...
من قلب شاب جريء
كان في يوم يبقى أنا

جوايا لسة حتة صغيرة
بتقوللي لسة الأمل موجود
بتقوللي ذكرى الحلم الجميل
طريقها مش مسدود
بتقوللي: ياللي كبرت في شبابك
و العمر خط في وشك خطوط
ياللي سافرت و سبْت أحبابك
و الألم شبك على وشك خيوط
ياللي عرفت الوقار..
و نسيت الشطوط
مهما الدنيا تلف بيك و تلففك
و مهما أحوالك تبسطك أو تقرفك
و مهما الفرح ينساك أو يعرفك
أوعى تنسى إن جواك حتة صغيّرة
من قلب شاب جريء
كان انت... و هيفضل انت

جواك لسة حتة صغيرة
جواك لسة حتة أمل


أحمد ثروت
27/3/2011